د روان زېږدیز کال په لومړیو دوو میاشتو کې ۴۹ زره تنه بې ځایه شوي دي

د ملګروملتونو سازمان د بشري مرستو د همغږۍ دفتر رپوټ ورکړی چې د روان زېږدیز کال په جنورۍ او فبرورۍ میاشتو کې د جګړې او ناامنۍ له امله د هېواد په ۱۷ ولایتونو کې کابو ۴۹ زره تنه بې ځایه شوي دي.
ددغه رپوټ له مخې، ډېری بې ځایه شوي د جګړو او بې وزلۍ له امله خپلو اصلي سیمو ته نه شي ستنېدای او په بې وزلۍ کې ژوند کوي.
د ملګروملتونو سازمان د بشري مرستو د همغږۍ دفتر د وري په درېيمه نېته اعلان کړی چې تر ډېره د ننګرهار، کندهار، بادغیس، فراه، هرات، نیمروز، هلمند، سمنګان، سرپل، بدخشان، بغلان، کونړ، تخار، کندز، کابل، بلخ او لغمان ولایتونو اوسېدونکي بې ځایه شوي دي.
د جګړې له امله ډېری بې ځایه شوي په ننګرهار، کندهار او بغلان ولایتونو کې ثبت شوي دي.
ددغې ادارې د مالوماتو پر بنسټ ۵۹ سلنه بې ځایه شوي ماشومان، ۲۱ سلنه ښځې او شل سلنه هم نارینه دي.
هر کال زرګونه وګړي د جګړو او ناامنیو له امله له خپلو سیمو بې ځایه کېږي. ډېری بې ځایه شوي کابل او نورو لویو ښارونو ته کډه کوي.