په کونړ کې د لمریزې برېښنا شبکې پرانیستل

مسؤلین وایې پر دغه شبکه چې د کونړ په مرکز اسد اباد کې جوړه شوې ۹،۱۸ میلیونه افغانۍ لګښت راغلی چې د ولسي تړون لخوا یې لګښت ورکړل شوی. د کلیو د پراختیا رئیس صفت الله شرفمل وویل چې دا شبکه د ولسي تړون ملي له مخې د ولسونو په لس سلنه ونډه د الکوزي شرکت په تخنیکي مرسته بشپړه شوې، چې ۲۰۸ کورنۍ به ترې ګټه واخلي.
ښاغلي شرفمل زیاته کړه چې، په دغه شبکه شاوخوا ۹،۱۸ میلیونه افغانۍ لګښت راغلی دی.
د کونړ والي محمد اقبال سعید وویل: د ولسي تړون ملي پروګرام له مخې په مرکز اسعد اباد، نرنګ، څوکۍ او ماڼوګۍ ولسوالیو کې د خلکو لومړیتوبونو ته په پام سره سلګونه پروژې پلې شوې او ځينې یې دوام لري.
هغه برېښنا د کونړ د اوسېدونکو مهمه اړتیا وبلله او په یاده برخه کې یې د مرکزي حکومت جدي پاملرنې د ټینګار ترڅنګ د روانو پروژو د تطبیق او نویو منظور شویو پروژو د کار د پیلولو په برخه کې د ولایت مقام د جدي هڅو ژمنه وکړه.
په ولسي جرګه کې د کونړ استازی نعمت الله کریاب وایي چې د کونړ اوسېدونکي د نظام پلویان دي او له ادارو سره په همغږۍ یې د امنیت په ټینګښت کې د همکاریو ترڅنګ پرمختیایي د پروژو د عملي کولو لپاره شرایط برابر کړي دي.
نوموړي له حکومتي ادارو وغوښتل، چې د ولسي تړون ملي پروګرام د دې ولایت نورو ولسوالیو ته هم وغځوي، چې خلک یو شان د حکومت له پروګرامونو برخمن شي.
کونړ چې پرېمانه اوبه لري، که چېرې پرې د برېښنا بندونه جوړ شي دغه ولایت به د خپلې اړتيا پوره کولو ترڅنګ ټول هېواد ته برېښنا ورکړي.
د یادونې وړ ده چې له تېرو څو کلونو راهیسې په کونړ کې د «مناګي» په نوم بند چارې بشپړې شوې خو له تراوسه ګټې اخیستو ته نه دی سپارل شوی.