۸صبح، سرپل: په سرپل کې سرچینې وايي چې په دغه ولایت کې پر یوې ۱۱ کلنې نجلۍ د ناپېژاندو کسانو له خوا جنسي تېری شوی او په وحشيانه ډول وژل شوې ده.
دغو سرچینو یکشنبه د چنګاښ پر ۲۱مه، ۸صبح ورځپاڼې ته وویل چې دا پېښه د سرپل ولایت په سوزمهقلعه ولسوالۍ کې شوې ده.
د معلوماتو له مخې، دغه نجلۍ رویدا نومېده او د ناپېژاندو کسانو له خوا د چاقو په مټ وژل شوې ده.
د سرچینو په وینا، د دغې نجلۍ پلار هاشم نومېږي او دا مهال په ایران کې دی.
تر اوسه د دې پېښې د عاملانو د پېژندنې او نیول کېدو په تړاو کوم راپور نه دی خپور شوی او ځایي طالبانو هم په دې تړاو رسنیو ته څه نه دي ویلي.
بلخوا، د هېواد په بېلابېلو برخو کې داسې پېښې د سراسري امنیت د ټينګښت په تړاو د طالبانو ادعاوې تر پوښتنې لاندې راولي.
