۸صبح، کابل: په ملګرو ملتونو کې د هند استازي له افغانانو د خپل هېواد پر دوامداره ملاتړ ټینګار کړی او له نړیوالې ټولنې یې غوښتي چې د افغانستان له ښځو او نورو وګړو ملاتړ وکړي او له دغه هېواد سره همکارۍ ته دوام ورکړي.
په ملګرو ملتونو کې د هند استازي هریش پارواټانني د افغان کډوالو پر جبري راستنېدو د اندېښنې په څرګندولو سره ویلي چې ستنول باید په خپله خوښه، خوندي او د انساني کرامت په ساتلو سره ترسره شي.
نوموړي د افغانستان په اړه د ملګرو ملتونو د امنیت شورا په غونډه کې وویل چې نړیواله ټولنه باید له ښځو او ټولو افغانانو ملاتړ وکړي او له افغانستان سره تعامل پر اصولو ولاړ او دوامدار وساتي.
پارواټانني زیاته کړه چې هند د افغانستان په ټولو ۳۴ ولایتونو کې د څه باندې ۵۰۰ ګډو پروژو له لارې د دغه هېواد په پرمختګ کې برخه اخیستې ده.
هغه وویل: «افغان ولس ته د بشري مرستو د رسولو لپاره زموږ ژمنتیا به دوام ولري. موږ د ملګرو ملتونو له بنسټونو او همدا راز د افغاني سره میاشتې ټولنې په څېر ادارو سره همکاري کوو څو مرستې هغو کسانو ته ورسېږي چې تر ټول ډېره اړتیا ورته لري.»
د هند استازي د ملګرو ملتونو د سرمنشي راپور ته په اشارې سره وویل چې د روان کال په لومړۍ نیمايي کې په افغانستان کې ۱۵۰ روغتیايي مرکزونه تړل شوي او له هېوادونو یې وغوښتل چې د دغه هېواد د روغتیايي سیسټم د پیاوړتیا لپاره پانګونه وکړي.
پارواټانني زیاته کړه چې هند د افغانستان د صادراتو پر یوه له مهمو مقصودونو بدل شوی او د افغانستان د اقتصادي پراختیا د ملاتړ په موخه د دوه اړخیزې سوداګرۍ پراخولو ته ژمن دی.
هند همدا راز خپل بازار ته د افغاني توکو له تعرفې پرته وارداتو زمینه برابروي، د افغانستان-هند د هوایي دهلېز له لارې سوداګري اسانه کوي او افغان سوداګرو ته اوږدمهالې وړیا سوداګریزې ویزې صادروي.
د هند استازي په دې لړ کې له یوناما د خپل هېواد پر ملاتړ ټینګار وکړ او د یوناما نوې مشرې رباب فاطمې ته یې د بریا هیله وکړه.
پارواټانني همدا راز وویل چې د هند او افغانستان اړیکې تاریخي دي او له اوسنیو پلو اخوا اوږد تاریخ لري.
