۸صبح، کابل: د هند د بهرنیو چارو وزارت ویاند رندهیر جیسوال ویلي چې چابهار بندر له افغانستان سره د بشردوستانه مرستو په برخه کې مهم دی.
دا څرګندونې ټایمز اف انډیا شنبه د غويي پر ۲۹مه د جیسوال له قوله لیکلې دي.
نوموړي زیاته کړې چې دا پروژه د ټولې سیمې په ځانګړې توګه په وچه کې راګیر افغانستان او منځنۍ اسیا په ګټه ده.
هغه ویلي چې امریکا له افغانستان سره د بشري مرستو دوام او دغه هېواد ته د اقتصادي بدیلونو په برابرولو کې د چابهار بندر پر ارزښت پوهېږي.
نوموړي زیاته کړې: «زه غواړم هغه څه چې [د هند بهرنیو چارو وزیر] وړاندې ویلي و، تکرار کړم چې موږ دې په دې تړاو تنګ نظره ونه اوسو.»
د جیسوال په خبره، هند ژمن دی چې چابهار بندر په وچه کې راګیر افغانستان او منځنۍ اسیا هېوادونو لپاره پر ارتباطي مرکز واړوي.
د هند د بهرنیو چارو وزارت ویاند یادونه کړې چې نوې ډېلي له ۲۰۱۸ کال راهیسې له دغه بندر څخه افغانستان ته ۸۵ مټریکه ټنه غنم، ۲۰۰ مټریکه ټنه غلې دانې او ۴۰ زره لیتره حشره وژونکي درمل لېږلي دي.
چابهار په ایران کې مهم سوداګریز بندر ګڼل کېږي چې د سیستان او بلوچستان په سوېل کې پروت دی.
دا بندر افغانستان له نړیوالو اوبو او ایران او هند له منځنۍ اسیا سره نښلوي.
پروسږکال د طالبانو د ریاست الوزرا اقتصادي مرستیال ملا عبدالغني برادر چابهار ته د خپل سفر په لړ کې له نوموړي هېواده غوښتي و چې دغه بندر ته د افغانستان لاسرسی زیات کړي، څو په خبره یې، د افغانستان توکي په اسانۍ نړیوالو بازارونو ته ورسېږي.
