۸صبح، کابل:د ازبکستان د احصایې ملي کمېټې اعلان کړی چې د ۲۰۲۶ کال په لومړیو دوو میاشتو کې د دغه هېواد او طالبانو ترمنځ د سوداګرۍ کچه ۲۹۸.۴ میلیونه ډالرو ته رسېدلې ده.
ټرېنډ خبري اژانس چهارشنبه د وري پر ۲۶مه د دې کمېټې په حواله راپور ورکړی چې دا کچه د ۲۰۲۵ کال د ورته مودې پرتله شاوخوا ۸.۱ سلنه زیاتوالی ښيي.
د راپور له مخې، د دواړو لورو ترمنځ د سوداګرۍ کچه د ۲۰۲۵ کال په لومړیو دوو میاشتو کې شاوخوا ۲۷۵.۹ میلیونه ډالره وه.
همداراز، ویل شوي چې د ۲۰۲۴ کال د جنورۍ او فبرورۍ پرتله د سوداګرۍ کچه تر دوو برابرو زیاته شوې ده.
د راپور له مخې، افغانستان لا هم د ازبکستان له مهمو سوداګریزو شریکانو دی او د سوداګرۍ د کچې له پلوه د دغه هېواد د ۲۰ غوره شریکانو په ډله کې راځي.
د راپور پر بنسټ، په سوداګرۍ کې تر ډېره کرنیز محصولات، د انرژۍ سرچینې او تولیدي توکي شامل دي.
دا په داسې حال کې ده چې د ازبکستان او افغانستان خصوصي سکتورونو په تېره یوه اوونۍ کې په کابل او هرات کې د شاوخوا ۱۰ میلیونه ډالرو په ارزښت سوداګریز هوکړهلیکونه لاسلیک کړي دي.
