۸صبح، کابل: د هند د بهرنیو چارو وزارت ویاند راندهیر جایسوال ویلي چې نوې ډیلي د بشردوستانه مرستو په چوکاټ کې د طالبانو تر کنټرول لاندې د کډوالو او بېرته راستنېدونکو چارو وزارت ته کورنۍ خېمې سپارلې دي.
جایسوال دوشنبه د چنګاښ پر ۲۲مه په خپله اېکس پاڼه کې لیکلي چې دا مرستې د بېرته راستنو شویو افغان کډوالو د مېشتېدو او بیاځواکمنېدو د ملاتړ په موخه، د کډوالو او بېرته راستنېدونکو چارو وزارت ته سپارل شوې دي.
نوموړي زیاته کړې چې دا له افغانانو سره د هند د بشري مرستو د دوام یوه برخه ده.
د هند د بهرنیو چارو وزارت د ویاند په خبره، کورنۍ خیمې کولی شي په اوسنیو شرایطو کې د راستنو شویو د اړتیا یوه برخه پوره کړي.
په وروستیو میاشتو کې له ګاونډیو هېوادونو څخه د افغان کډوالو د بېرته ستنېدو بهیر له چټکېدو سره هممهاله، نړیوالو بنسټونو په وار وار خبرداری ورکړی چې هېواد ته بېرته راستانه شوي سرپناه، لومړنیو خدماتو او بشري مرستو ته بېړنۍ اړتیا لري.
