۸صبح، کابل: هند په کونړ او ننګرهار کې له زلزلهځپلو سره د مرستو رسولو د پیل خبر ورکړی دی.
د هند د بهرنیو چارو وزارت دوشنبه د وږي پر ۱۰مه اعلان کړی چې د دغه وزارت وزیر جي شنکر د طالبانو د بهرنیو چارو له وزیر امیرخان متقي سره پر ټیلیفون غږېدلی او د قربانیانو له کورنیو سره یې د خواخوږۍ څرګندولو ترڅنګ ویلي چې هېواد یې زر خیمې کابل ته سپارلې دي.
نوموړي زیاته کړې چې په کابل کې د هند سیاسي استازولۍ ۱۵ ټنه خوراکي توکي هم کونړ ته لېږلې دي.
شنکر ټینګار کړی چې له هند څخه به له چهارشنبې وروسته افغانستان ته نورې مرستې هم واستول شي.
په کونړ او د ننګرهار په ځينو سیمو کې بیګانۍ زلزلې سلګونو کسانو ته مرګژوبله اړولې ده.
د راپورونو له مخې، د دې طبیعي پېښې په پایله کې تر اوسه څه باندې ۸۰۰ کسان مړه شوي او له ۲۵۰۰ ډېر ټپيان دي.
