د هېواد د بهرنیو چارو وزیر محمد حنیف اتمر نوي ډیلي ته په سفر کې له خپل هندي سیال س. جي شنکر سره وکتل.
د بهرنیو چارو وزارت د اعلان له مخې، هندي لوري په دغه کتنه کې د سولې له بهیر او په تېرو دوو لسیزو کې د افغانانو له لاس ته راوړنو خپل ملاتړ اعلان کړی دی.
د هند د بهرنیو چارو وزیر همداراز وېلي چې د افغانستان د سولې او پرمختګ په اړه سیمه ییزو ناستو له هغې جملې د استانبول، په تاجکستان کې د آسیا د زړه هېوادونو او د ترکیې د سولې په غونډو کې ګډون ته چمتو دی.
د بهرنیو چارو وزارت اعلان کړی چې له خپل هندي سیال سره د محمد حنیف اتمر د خبرو چورلیز د دوه اړخیزو اړیکو پراختیا او د افغانستان د سولې مذاکراتو په اړه د سیمه ییزې او نړیوالې اجماع پياوړتیا، اقتصادي همکارۍ او د سیمې نښلول دي.
ښاغلي اتمر په دغه کتنه کې له افغانستان سره د هند د کابو درې میلیارد ډالرو اقتصادي او پرمختیايي مرستو مننه کړې ده.
د هند د بهرنیو چارو وزیر په دغه کتنه کې زیاته کړې چې هېواد به یې په افغانستان کې د بیارغونې او پرمختګ له بهیره خپل ملاتړ ته دوام ورکړي.
له منځنۍ آسیا سویلي آسیا ته د افغانستان له لارې د اورګاډي پټلیو په غځولو سره د سیمې نښلول، د چابهار بندر پراختیا او د دواړو هېوادونو ترمنځ د سوداګریزو راکړو ورکړو زیاتوالی د هند د بهرنیو چارو له وزیر سره د حنیف اتمر د خبرو نورې برخې وې.
