۸صبح، کابل: د کړکېچ نړیواله ډله وايي چې د طالبانو تګلارې په ځانګړې توګه پر ښځو او نجونو پراخو محدودیتونو، افغانستان په نړیواله کچه منزوي کړی دی.
دغې ډلې پر افغانستان د طالبانو د واکمنېدو پنځمې کلیزې په مناسبت ویلي چې له نړیوالې ټولنې د دغه هېواد منزوي کېدل د طالبانو د تګلارو پایله ده او په وینا یې د دغه وضعیت دوام ښايي افغانستان ته ډېر زیان واړوي.
په راپور کې راغلي چې له بنسټيزو حقونو د نجونو او ښځو محرومیت نه یوازې د افغانستان کورنی وضعیت اغېزمن کړی، بلکې د طالبانو رژیم یې په نړیواله کچه له مخالفت او پراخې انزوا سره مخ کړی دی.
د کړکېچ نړیوالې ډلې د طالبانو او پاکستان ترمنځ ترینګلو اړیکو ته په اشارې ویلي چې د دواړو غاړو ترمنځ نښتو، د افغانستان او پاکستان ترمنځ سوداګري او ترانزیټ کابو درولی دی.
دغې ډلې زیاته کړې چې د افغانستان اقتصادي ستونزې د طبیعي پېښو او له ایران سره د امریکا او اسراییلو د جګړې له کبله زیاتې شوې دي.
د کړکېچ نړیوالې ډلې همداراز ویلي چې د طالبانو له واکمنېدو پنځه کاله وروسته اوس د افغانستان په ځينو برخو کې د دغې ډلې پر وړاندې وسلهوالې نښتې زیاتې شوې دي.
