د مې لومړۍ نېټه هر کال د نړۍ په ګوټ ګوټ کې د کارګر نړيوالې ورځې په توګه لمانځل کېږي. د دغې ورځې له رارسېدو سره هممهاله ويل کېږي چې په افغانستان کې د کارګرانو ۸۰ سلنه حقونو تر پښو لاندې کېږي.
د افغانستان د کارګرانو ټولنې مسؤلين وايي چې، د کارګرانو له بې وزلۍ ناوړه ګټه اخيستل، د رخصتيو په ورځو کې هم له دوی څخه کار اخيستل، د ورځنيو او مياشتنيو حقونو په سمه توګه او په وخت نه ورکول، د ادارو او بنسټونو مشرانو لخوا له دوی سره ناوړه چلند کول هغه مهم موارد دي چې افغان کارګران ورسره لاس او ګرېوان دي.
له بلې خوا د کار نړيوال سازمان مسؤلينو د دغې ورځې په مناسبت ويلي دي چې د کرونا وبا کارګرانو ته سرخوږی جوړ کړی او د دغه ويروس له امله د نړۍ په ګوټ ګوټ کې ميليونونه کسان له بې وزلۍ، بې کارۍ او لوږې سره مخامخ دي.
په ورته وخت کې د افغانستان کار او ټولنيزو وزارت هم د يوې خبرپاڼې په خپرولو سره ويلي دي چې ياد وزارت د يو مسؤل بنسټ په توګه مکلف دی چې د کارګرانو له خونديتوب څخه نیولې د دوی د حقوقو د ورکړې پورې په ټولو برخو کې د د دوی ملاتړ وکړي.
د کارګر نړیواله ورځ له ۱۸۸۶ زېږديز کال راهيسې په ټوله نړۍ کې لمانځل کېږي.
له نن څخه ۱۳۵ کاله وړاندې په همدې ورځ (د مې په لومړۍ نېټه) د امريکا په شیکاګو ښار کې کارګرو د يو لاريون په ترڅ کې د کار د شرايطو د تعديل غوښتنه وکړه.
لاريون کوونکو غوښتنه لرله چې د کار ساعتونه دې له ۱۰/۱۴ څخه ۸ ته راکښته شي، خو هغه وخت دغه غوښتنه ونه منل شوه او له همدې امله پاڅون کوونکو اعتصاب ته مخ کړه. د اعتصاب کوونکو شمېر ورو ورو ۹۰ زرو ته ورسېد او د امريکا له هرګوټ څخه په کې کارګرو برخه لرله. اعتصاب څو ورځو ته وغځېد او په پايله کې د لاريون کوونکو او پوليسو ترمنځ نښتې وشوې او یو شمېر کارګران مړه شول. دغه کار د نړيوالو سخت غبرګون سره مخ شو او له همغې مودې راهيسې هر کال د مې میاشتې لومړۍ نېټه د کارګر نړيوالې ورځې په توګه لمانځل کېږي.