د پښتو ژبې نړيواله ورځ ولمانځل شوه

د غبرګولي ۸مه چې د مې میاشتې له ۲۹مې نېټې سره سمون خوري د پښتو ژبې د نړيوالې ورځې په توګه لمانځل کېږي. دا ورځ هر کال په افغانستان، پاکستان او ځینو نورو هېوادونو کې پښتانه فرهنګیان او عام وګړي لمانځي.
سږکال هم (د روان کال د غبرګولي په اتمه) دغه ورځ د افغانستان او پښتونخوا په ګډون د نړۍ په ګوټ ګوټ کې د پښتو ژبې او ادب فعالينو او ځوانانو لخوا ولمانځل شوه، خو د کورونا ويروس له امله يې د لمانځل پيکه و. افغان سیاستوالو هم په ټولنيزو رسنیو په همدې مناسبت د مبارکۍ پیغامونه لیکلي ؤ.
د دغې ورځې په مناسبت د افغان ځوانانو له ډلې لخوا د نوموتو څېرو په ګډون يو آنلاين سیمينار او همداراز پر ټوېټر د پښتو_ورځ تر عنوان لاندې هشټېګ هم وچلول شو. د افغان ځوانانو ډلې له تېرو درېيو کلونو راهيسې د دې ورځې په مناسبت ځانګړي پروګرامونه برابروي. د دغې ډلې يوه غړي عبدالقهار همت له ۸صبح پښتو مجلې سره په خبرو کې وويل چې سږکال يې د پښتو ورځ تر عنوان لاندې يو انلاين سیمينار جوړ کړی ؤ چې د پښتون ژغورنې غورځنګ مشر منظور احمد پښتين، د افغانستان د علومو اکاډمۍ د پښتو څانګې مشر سيد نظیم سعيدي، وتلي پښتون سياستوال افراسياب خټک، ليکوالې او شاعرې شفېقې خپلواک په ګډون په کې د افغانستان، پښتونخوا او لندن څخه ځيني نورو مېلمنو هم برخه لرله. ښاغلي همت زياته کړه چې ددغه سيمينار ويناوالو په خپلو خبرو کې د پښتو ژبې په وړاندې د شته ننګونو، فرصتونو او د ژباړې او لیکوالۍ په اړه خپل نظريات شريک کړل او دغه سيمينار هم مهاله د سلهاو ليدونکو لخوا د ټولنيزو رسنيو له لارې څارل کېده. یو شمېر خلکو د دې ورځې په مناسبت پر خواله رسنیو د #پښتو_ورځ هشټېګ په کارولو سره پیغامونه خپاره کړي ؤ. د کوزې پښتونخوا فعالې سياستوالې او د پښتون ژغورنې غورځنګ غړې ثنا اعجاز پر خپل ټویټر لیکلي، پښتو که د ماشین، ټکنالوژۍ او اقتصاد ژبه نه شوه، نو که ډېرې چيغې هم ووهو؛ ورکه به شي.
کابل مېشتي د ټولنيزو رسنيو فعال حبيب خان توتاخېل بيا په خپل ټوېټر ليکلي ؤ چې، پښتو ژبې په وروستيو لسيزو کې د نورو ژبو په پرتله ګړندی تګ کړی او له پخوا ډېره بډایه شوې ده، خو په وينا يې لا هم ډېر کار ته اړتيا ده.
هاخوا په کندهار کې دغه ورځ د دې ولایت د اطلاعات او کلتور ریاست او ځوان کهول ملي ټولنې لخوا ولمانځل شوه چې د کندهار ګڼو فرهنګي او ادبي فعالينو په کې برخه لرله او د پښتو ژبې د ودې او پرمختګ په لارو چارو يې ويناوې وکړې.