ولسي جرګې ته د نوماند وزیرانو معرفي کېدل

افغان ولسمشر محمد اشرف غني د چهارشنبې په ورځ پارلمان ته د ۲۴ نوماند وزیرانو او رییسانو د معرفي کولو او له ولسي جرګې د باور رایې اخیستو په غونډه کې ووېل: فساد پر راتلونکي د بې باورۍ یو لامل دی، چې ښکاره بېلګه یې بهرنیو هېوادونو ته د لسګونو میلیارد ډالرو لېږدول دي، «پیسې دلته پیدا شوې، خو بېرته بهر ته انتقال شوې دي.»
ولسمشر زیاته کړه چې د افغانستان چاپېریال له خطرونو او فرصتونو ډک ماحول دی، دا په موږ پورې اړه لري چې پر خطرونو څنګه برلاسي او له فرصتونو ګټه واخلو.
هغه ووېل: د نړۍ ډېری هېوادونه د سوله ییز، خپلواک، متحد او ولسواک افغانستان په اړه له موږ سره همغږي دي.
پارلمان ته د ولسمشر غني د وینا پرمهال ځینو وکیلانو مخالفت وښود چې د یوې مودې لپاره د غونډې په تالار کې نسبي ګډوډي رامنځ ته شوه، خو د ولسي جرګې د مشر او ولسمشر په ټینګار معترض وکیلان ارام شول.
ولسمشر غني ولسي جرګې ته په وینا کې ووېل: تر ۳۰۰ کلونو وروسته اسیا بیا په نړۍ کې پر لوی اقتصادي قوت د بدلېدو په حال کې ده.هغه زیاته کړه: «په راتلونکو څو لسیزو کې به آسیا په یو منسجم اقتصادي براعظم بدله شي، افغانستان چې د آسیا په زړه کې دی، د سویليآسیا، مرکزي آسیا او لوېدیځېآسیا ترمنځ تر ټولو نژدې د وصل لاره ده، له دې موږ ټول عظیمه ګټه اخیستلی شو.» افغان ولسمشر د وینا پای کې وویل: د رېل پټلۍ جوړېدل او د افغانستان له خاورې د برېښنايي مزو تېرېدل به د افغانستان موقعیت په سرو زرو بدل کړي.
هغه زیاته کړه: د کانونو له اړخه د افغانستان ځمکنۍ پانګه یو ټرېلیون ډالره اټکل شوې او د شل زره مېګاواټه اوبو د برېښنا ظرفیت لري.
افغان ولسمشر محمد اشرف غني له دوهم ځل ولسمشر کېدو وروسته د روان کال د مارچ میاشتې په نهمه ویلي و، دوه اونۍ وروسته به نوې کابینه د باور رایې په موخه ولسي جرګې ته معرفي کړي، خو اوس له هغې نېټې کابو اوه میاشتې تېرېږي.
د اوسنۍ کابینې ډېری غړي د ښاغلي غني او ډاکتر عبدالله له خوا معرفي شوي نوماند وزیران دي.
په نوې کابینه کې د کورنیو، دفاع او کلیو او پراختیا وزارتونو مخکني وزیران بیا د نوماندانو په توګه معرفي شوي او پاتې ټول نوې څېرې دي.