۸صبح، کابل: د کډوالۍ نړیوال سازمان (IOM) ویلي چې په افغانستان کې یې له څه باندې ۳۹۳ زرو راستنو شویو سره بېړنۍ مرسته کړې ده.
نوموړي بنسټ سهشنبه د زمري پر ۲۷مه راپور ورکړی چې دا مرستې د ۲۰۲۵ کال د مارچ له میاشتې د ۲۰۲۶ کال تر مې پورې د اروپايي ټولنې په ملاتړ د افغانستان په پنځو ولایتونو کې له راستنو شویو سره شوې دي.
د راپور له مخې، دا کسان د هرات، نیمروز، کندهار، هلمند او ننګرهار له لارې افغانستان ته راستانه شوي دي.
دغه سازمان ویلي چې راستنېدونکو ته د هغوی د بېړنیو اړتیاوو له مخې، لکه لنډمهاله سرپناه، لومړنۍ روغتیايي پاملرنه، د انتقال اسانتیاوې او څو موخیزې نغدي مرستې ورکړل شوې دي.
ملګرو ملتونو زیاته کړې چې دا مرستې په داسې شرایطو کې وړاندې شوې دي چې افغانستان د کډوالو د پراخو بېرته راستنېدو، طبیعي پېښو او د بشري مرستو د اړتیاوو د زیاتېدو له څپې سره مخ دی.
دغه بنسټ ویلي چې له پاکستان او ایرانه د افغانانو په بېرته راستنېدو کې د پام وړ زیاتوالي پر پولو، بنسټیزو خدماتو او کوربه ټولنو فشار راوړی دی.
