۸صبح، کابل: د امریکا د کانګرېس د ۶۶ غړو یوې ډلې د دغه هېواد د ولسمشر ډونالډ ټرمپ ادارې ته په یوه لیک کې د څه باندې ۱۵۰ افغانانو د ډلهییز ایستلو د طرحې د لغوه کولو غوښتنه کړې ده.
د کانګرېس غړو دغه لیک دوشنبه د لړم پر ۱۱مه، د امریکا حکومت ته استولی او په هغه کې یې افغانستان ته د دغو وګړو د بېرته ستنولو د پایلو په اړه خبرداری ورکړی دی.
دوی د امریکا د بهرنیو چارو وزیر مارکو روبیو او د کورني امنیت وزیر مارکوېن مولین ته په خطاب کې ویلي چې ښايي دغه کسان له امریکا سره د همکارۍ یا پر طالبانو د نیوکې له امله د دې ډلې له غچ اخیستنې سره مخ شي.
د لیک په یوه برخه کې لیکل شوي دي: “زموږ هیواد هغو افغانانو سره ژمنه کړې چې د خپل ځان او د خپلو کورنیو امنیت یې په خطر کې اچولی څو د امریکایي سرتیرو سره ودریږي چې هیڅکله به یې یوازې نه پریږدي.”
د راپورونو له مخې، ټاکل شوې ده چې دغه افغانان د امریکا د لويیزیانا ایالت له توقیفځایونو پاکستان ته ولېږدول شي.
د امریکا د کورني امنیت وزارت چارواکو هم محکمې ته په وړاندې شویو اسنادو کې ویلي چې په پای کې غواړي د دغو کسانو یوه ډله بېرته افغانستان ته ولېږدوي.
