۸صبح، کابل: د کډوالۍ نړیوال سازمان (IOM) اعلان کړی چې په افغانستان کې د دغه بنسټ د ماموریت مشر په تورخم کې له راستنېدونکو افغان کډوالو سره د بیړنیو مرستو د وړاندې کولو له بهیر څخه لیدنه کړې ده.
نوموړي سازمان سهشنبه د زمري پر ۶مه راپور ورکړی چې دا لیدنه افغان راستنېدونکو ته د لومړنیو مرستو د برابرولو د بهیر د ارزونې په موخه شوې ده.
د راپور له مخې، د کډوالۍ نړیوال سازمان د همکارو ادارو په همکارۍ په تورخم کې راستنېدونکو افغان کډوالو ته د بیړنیو خدماتو او ملاتړ د وړاندې کولو لپاره فعالیت کوي.
دا په داسې حال کې ده چې له ایران او پاکستان څخه د افغانانو د ایستلو لړۍ دوام لري او په دې وروستیو کې چټکه شوې ده.
