۸صبح، کابل: د کډوالۍ نړیوال سازمان (IOM) په افغانستان کې د دغه سازمان په نوم د جعلي کاري وړاندیزونو په اړه خبرداری ورکړی دی.
نوموړي بنسټ دوشنبه د وږي پر ۲مه په اېکس پاڼه کې له خلکو غوښتي چې له کاري غوښتنې یا د معلوماتو له شریکولو وړاندې د دغو وړاندیزونو له رسمي والي ډاډ ترلاسه کړي.
د کډوالۍ نړیوال سازمان ویلي چې په افغانستان کې د دغه بنسټ ټولې کاري خبرتیاوې د «ACBAR» کارموندنې ویبپاڼې له لارې خپرېږي.
یاد بنسټ زیاته کړې چې د کډوالۍ نړیوال سازمان د استخدام له بهیر سره اړوند هر ډول اړیکه د @iom.int ډومېن لرونکي رسمي برېښنالیک له لارې ترسره کېږي.
د کډوالۍ نړیوال سازمان ټینګار کړی چې د دندو لپاره هېڅ ډول فیس نه اخلي او له غوښتونوالو بانکي یا نور حساس معلومات نه غواړي.
