د ایران د خاتمالانبیا د مرکزي قرارګاه قوماندان علي عبداللهي له سیمهییزو هېوادونو غوښتي چې له امریکا سره پر خپلې همکارۍ او همغږۍ بیاکتنه وکړي.
الجزیرې شنبه د اګست پر لومړۍ راپور ورکړی چې عبداللهي ویلي امریکا هڅه کوي د سیمې د هېوادونو شتمني، بنسټیزې اسانتیاوې او سرچینې د خپل «کمزوري شوي پوځ د دفاعي ډال» په توګه وکاروي.
هغه همداراز خبرداری ورکړی چې د تهران پر وړاندې د واشنګټن اقدامات د سیمې د یوې پراخې شخړې د رامنځته کېدو خطر زیاتوي.
عبداللهي زیاته کړې، هر هغه هېواد چې د امریکا د «دفاعي ډال» په توګه عمل وکړي، د جګړې د رامنځته کېدو په صورت کې به یې په اور کې وسوځېږي.
دا څرګندونې داسې مهال کېږي چې د ایران او امریکا ترمنځ ترینګلتیا لا هم روانه ده، او د دواړو هېوادونو چارواکو په وروستیو میاشتو کې څو ځله د مقابل لوري د اقداماتو د امنیتي او سیمهییزو پایلو په تړاو خبرداری ورکړی دی.
