۸صبح، کابل: د ایران د زعفرانو د صادرکوونکې اتحادیې رییس غلامرضا میري ویلي چې د دغه هېواد ډېره برخه زعفران افغانستان ته قاچاقېږي او په هسپانیې کې بستهبندي کېږي.
د فارس خبري اژانس د راپور په حواله، نوموړي یکشنبه د مرغومي پر ۲۴مه ویلي چې هر کال د دغه هېواد د نږدې نیمايي زعفرانو ارزښت د قاچاقچیانو جیبونو ته ځي.
د هغه په خبره، تېر کال په ایران کې د ۲۲۵ ټنه تولید شویو زعفرانو له ډلې ۹۰ ټنه یې چې ۴۰ سلنه کېږي، قاچاق شوې دي.
غلامرضا ویلي چې افغانستان د نړۍ د زعفرانو ۲۱ سلنه او هسپانیې بیا ۱۶ سلنه بازارونه «قبضه» کړې دي.
په راپور کې راغلي: «په داسې حال کې چې ایران په نړۍ کې د زعفرانو ۸۸ سلنه تولید په واک کې لري؛ خو په نړیوالو بازارنو کې یوازې ۳۶.۷ سلنه برخه لري. یعنې د ایران په نوم نږدې دوه پر درېیمه برخه صادرات نړیوالو بازارنو ته نه ځي.»
دا څرګندونې داسې مهال کېږي چې د نړۍ په کچه له پرلپسې کلونو راهیسې د افغانستان زعفران د کیفیت او مزې له اړخه لومړی مقام ګټي او د اروپا د نړیوالې موسسې درې ستوریزه جایزه یې هم ګټلې ده.
