۸صبح، کابل: د پاکستان د بهرنیو چارو وزیر اسحاق ډار له طالبانو غوښتي چې د پاکستاني طالبانو تحریک (ټيټيپي) او نورو ترهګرو ډلو پر وړاندې ځانګړي او عملي ګامونه پورته کړي.
ډار دوشنبه د تلې پر ۲۰مه ویلي چې طالبان دې د دغو ډلو پر وړاندې ځانګړي، د تایید وړ او بېرته نه راګرځېدونکي ګامونه پورته کړي.
نوموړي دا څرګندونې د اسلاماباد د ستراتیژیکو مطالعاتو انستیتوت (ISSI) په نړیوال کنفرانس کې کړې دي.
ډار ټینګار کړی چې د پاکستان یا نورو هېوادونو پر وړاندې د ترهګریزو بریدونو لپاره دې د افغانستان خاوره نه کارول کېږي.
د پاکستان د بهرنیو چارو وزیر هند هم تورن کړی چې د پاکستان پر وړاندې له فعالو ترهګرو ډلو ملاتړ کوي چې د ادعا له مخې یې، هغه ډلې هم پکې شاملې دي چې د افغانستان له خاورې فعالیت کوي.
اسحاق ډار ویلي چې د دغو ډلو ملاتړ د سیمې سولې، ثبات او امنیت ته سخت ګواښ دی.
دا په داسې حال کې ده چې مخکې د پاکستان د اطلاعاتو وزیر عطاالله ترار هم ادعا کړې وه چې په افغانستان کې تر ۲۰ زرو ډېر ترهګر شته چې پکې څه باندې شپږ زره یې د ټيټيپي غړي دي.
