د ایران د بهرنیو چارو وزیر عباس عراقچي ویلي چې د لبنان حزبالله ډلې او اسرائیل ترمنځ د اوربند له شوې هوکړې هرکلی کوي او په خبره یې، هیله لري چې دا هوکړه دایمي اوربند ته لار هواره کړي.
رویټرز خبري اژانس چهارشنبه د نومبر پر ۲۷مه راپور ورکړی چې عراقچي داسې مهال د حزبالله او اسرائیل ترمنځ له اوربنده هرکلی کړی چې په خبره یې، پر تلابیب د ایران د غچ اخیستنې برید حق پر ځای دی.
د یادونې ده چې پرون د امریکا او فرانسې په منځګړیتوب د اسرائیل او د ایران تر ملاتړ لاندې د لبنان حزبالله ډلې ترمنځ اوربند وشو.
عراقچي د دې پوښتنې په ځواب کې چې وروستی اوربند به د ایران او اسرائیل ترمنځ کړکېچ کمېدو کې مرسته وکړي، ویلي چې دا تلابیب پورې تړاو لري.
تېره میاشت ایران او اسرائیل پر یو بل توغندیز بریدونه وکړل.
د اسرائیلو لومړي وزیر بنیامین نتنیاهو د اوربند اعلانولو پر مهال ویلي و چې د لبنان حزبالله ډله کمزورې شوې او په خبره یې، هېواد به یې خپل بریدونه پر حماس او ایران متمرکز کړي.
