اسرائیل په غزه کې د شاوخوا ۱۰۰ کسانو له وژلو وروسته ادعا کړې چې بېرته د اوربند هوکړې ته ستون شوی دی.
په غزه کې روغتیايي چارواکو چهارشنبه د اکتوبر پر ۲۹مه ویلي چې په غزه کې د اسرائیلو په بریدونو کې د ښځو او ماشومانو په ګډون لږ تر لږه ۱۰۰ کسان وژل شوي دي.
دا د امریکا د ولسمشر دونالډ ټرمپ له خوا د شوي اوربند له هوکړې درې اوونۍ وروسته، د اسرائیل له خوا تر ټولو مرګوني بریدونه ګڼل کېږي.
د اسرائیل دفاع وزیر ویلي چې په شپنیو بریدونو کې یې د «حماس لسګونه قوماندانان» وژلي او پوځ یې د سهار له ۱۰ بجو وروسته اوربند ته راګرځېدلی.
د غزې روغتیايي چارواکو ویلي چې په وژل شویو کې ۳۵ ماشومان هم دي.
اسرائیل دا بریدونه له هغې وروسته وکړل چې حماس یې د اوربند پر ماتولو تورن کړ.
حماس بیا له اوربنده سرغړونه رد کړې او زیاته کړې یې ده چې د یرغملو د جسدونو د بېرته ګرځولو هڅه کوي.
د راپورونو له مخې، اسرائیل څو وارې د اوربند له هوکړې سرغړونه کړې ده.
ورته مهال د امریکا ولسمشر ډونالډ ټرمپ ویلي چې د غزې اوربند له ګواښ سره مخ نه دی.
