۸صبح، کابل: په کابل کې د ایران اسلامي جمهوریت سفارت د نورستان ولایت او د افغانستان د ختیځو سیمو د سېلابونو د قربانیانو له کورنیو سره خپله خواخوږي څرګنده کړې ده.
دغه سفارت سه شنبه د چنګاښ پر ۳۰مه، پر اېکس پاڼه د سېلابونو پر راتلو د خواشینۍ پر څرګندونو سربېره، د مړو شويو کسانو له کورنیو سره خواخوږي ښودلې او ټپیانو ته یې د بېړنۍ روغتیا هیله څرګنده کړې ده.
پرون د نورستان ولایت په مرکز پارون ښار کې د سېلابونو له امله ۲۰ کسان مړه، ۸۰ کسان ټپیان او ۱۰۰ نور لادرکه شوي دي.
وروستیو سېلابونو د افغانستان په بېلابېلو سیمو کې پراخ ځاني او مالي زیانونه اړولي دي.
دا ډول طبیعي پېښې په وروستیو کلونو کې د افغانانو لپاره پر یوه جدي ګواښ بدلې شوې دي؛ هر کال ګڼ هېوادوال د سېلابونو له امله خپل ژوند له لاسه ورکوي او کورونه، کرنیزې ځمکې او عامه بېخ بنسټونه هم زیانمنېږي
