د ایران د بهرنیو چارو وزارت په یوه خبرپاڼه کې په دغه هېواد کې پر ځینو سیمو د امریکا وروستي بریدونه غندلي او واشنګټن یې د اسلاماباد د هوکړهلیک د ټولو مادو په نقض کولو تورن کړی دی.
ایرنا خبري اژانس دوشنبه د جولای پر ۱۳مه راپور ورکړی، چې دغه وزارت پر ایران د امریکا بریدونه د ملګرو ملتونو د منشور د بنسټیزو اصولو نقض بللی دی.
د راپور له مخې، د ایران د بهرنیو چارو وزارت ادعا کړې چې دغو بریدونو په لوېدیځې اسیا کې د کړکېچ د کمولو او د ټیکاو د راوستلو لپاره په وروستیو څو میاشتو کې شوې ټولې هڅې بېپایلې کړې دي.
د ایران د بهرنیو چارو وزارت همداراز امریکا متحده ایالتونه پر ایران په بریدونو کې د «جنګي جنایتونو» په ترسره کولو تورن کړي دي.
دا په داسې حال کې ده چې په وروستیو ورځو کې د ایران او امریکا ترمنځ د ترینګلتیا زیاتوالی په هرمز تنګي کې د پوځي نښتو لامل شوی او په دغه تنګي کې یې سمندري سوداګري له خنډ او ځنډ سره مخ کړې ده.
