د ایران سپاه پاسداران ادعا کړې چې په اردن کې یې د امریکا د یوې هوايي اډې مهم تأسیسات او د امریکايي ځواکونو د استوګنې ځایونه په توغندیز برید کې په نښه کړي دي.
تسنیم خبري اژانس سه شنبه د جولای پر ۱۴مه، راپور ورکړی چې سپاه پاسداران دا خبره په خپره کړې خبرپاڼه کې کړې ده.
د راپور له مخې، سپاه پاسداران ادعا کړې چې امریکايي ځواکونو له دغې اډې په ایران کې پر هدفونو د بریدونو لپاره کار اخیسته.
سپاه پاسداران ویلي چې پر دې هوايي اډه یې په بالستیک توغندیو برید کړی دی.
دا په داسې حال کې ده چې ایران او امریکا په وروستیو اوونیو کې د نښتو په زیاتېدو سره یو بل د اوربند او د اسلاماباد د هوکړه ليک په نقض تورنوي.
