۸صبح، کابل: د ایران د کورنیو چارو وزیر، سکندر مومني یو ځل بیا له دغه هیواده د ناقانونه کډوالو پر وتلو ټینګار کړی او په وینا یې، افغان کډوال دې بېرته ستانه شي او خپل هېواد دې جوړ کړي.
مومني دا څرګندونې دوشنبه د وږي پر ۱۹مه، له «دانشجو خبري اژانس» سره په مرکه کې کړې دي.
د هغه په وینا، د «کډوالو جوړې شوې طرحې» پر بنسټ په لومړي ګام کې له ایرانه هغه کډوال باسي چې د اوسېدو اسناد نه لري.
نوموړي ایراني چارواکي ویلي چې روان وضعیت تهران ته د زغملو نه دی.
د ايران د كورنيو چارو وزير څرګنده کړې: «په ايران كې له مېشتو افغانانو څخه غوښتنه کېږي چې خپل هېواد ته ستانه شي او جوړ یې کړي.»
سکندر ټینګار کړی چې د ایران شرایط نور کډوالو ته د منلو اجازه نه ورکوي.
پر افغانستان د طالب وسلهوالې ډلې له واک ته رسېدو وروسته د امنیتي او اقتصادي ننګونو له کبله سلګونه زره هېوادوال ایران او پاکستان ته تللي دي.
دې دواړو هېوادونو په وروستیو میاشتو کې د کډوالو جبري شړلو بهیر چټک کړی دی.
د نړیوالو بنسټونو د معلوماتو پر بنسټ، دا مهال په ایران کې له درې میلیونو زیات کډوال ژوند کوي.
