د ایران سپاه پاسداران ادعا کړې چې په سیمه کې د امریکایي هدفونو د په نښه کولو په ترڅ کې یې د عمان په «دقم» بندر کې د امریکایي الوتکو وړونکو بېړیو د ملاتړ لوژستیکي مرکزونه او د تېلو د اکمالاتي ځایونه له منځه وړي دي.
تسنیم خبري اژانس یکشنبه د جولای پر ۱۲مه راپور ورکړی، چې دا موضوع د ایران د سپاه پاسداران د عامه اړیکو دفتر اعلان کړې ده.
د راپور له مخې، د ایران سپاه پاسداران ادعا کړې چې دا امریکایي هدفونه یې پر امریکایي اډو د بریدونو په درېیم پړاو کې ویجاړ کړي دي.
سپاه پاسداران په سیمه کې پر امریکایي اډو خپل بریدونه د ایران پر ساحلي سیمو د امریکایي ځواکونو د بریدونو په غبرګون کې بللي دي.
دا په داسې حال کې ده چې د امریکا مرکزي قوماندانۍ (سنټکام) هم په ایران کې د شاوخوا ۱۴۰ پوځي هدفونو د ویشتلو خبر ورکړی دی.
په وروستیو ورځو کې د هرمز تنګي د کنټرول پر سر د ایران او امریکا ترمنځ ترینګلتیاوې خورا زیاتې شوې دي، چې له امله یې پوځي نښتې هم رامنځته شوې دي.
