۸صبح، کال: د اسلامي امداد سازمان (Islamic Relief Organization) خبرداری ورکړی چې د افغانستان په ختیځ کې له مرګونې زلزلې یوه میاشت وروسته شاوخوا ۹۰ سلنه اغېزمن مناسبه سرپناه نه لري.
نوموړي بنسټ سهشنبه د تلې پر ۱۵مه راپور ورکړی چې د سخت ژمي په نږدې کېدو سره د زلزلهځپلو ژوند له ګواښ سره مخ دی.
یاد سازمان زیاته کړې چې په کونړ کې یې وروستۍ ارزونې ښيي چې ګڼې کورنۍ په پرانېستي چاپېریال یا لنډمهالو پنډغالو کې ژوند کوي او سړه هوا چې کچې ان تر منفي ۲۰ درجو رسېږي، جدي ګواښ دی.
د راپور له مخې، زلزله ځپلو ته د مرستو رسولو بهیر د بودیجې د کمښت له کبله سوړ دی.
په افغانستان کې د نوموړي سازمان د پروګرامونو برخې مسوول ابراهیم الحمادي ویلي: «که زلزله ځپلي ژر خوندي پناه ځایونو ته ونه لېږدول شي، د یخې هوا او ناروغيو ګواښ ورته په کمین کې دی. ګڼو کورنیو خپل ټول شته او خوراکي سرچینې له لاسه وکړې او د ژمي لپاره بېړنۍ خیمې بسنه نه کوي.»
د یاد سازمان په راپور کې راغلي چې تر اوسه پر زلزله ځپلو څه باندې ۲۰۰ خیمې، ۹۵۰ روغتیايي کڅوړې او څو ګرځنده تشنابونه وېشلې دي.
نوموړي بنسټ له نړیوالې ټولنې غوښتي چې په ژمي کې له بشري غمیزې د مخینوي لپاره بېړنی ملاتړ وکړي.
د راپور له مخې، په افغانستان کې د ۲۰۲۵ کال لپاره د ملګرو ملتونو د بشردوستانه اړتیاوو او غبرګون پلان د اړینې بودیجې یوازې څه کم ۳۰ سلنه تامین شوې او نورو ۱۳۹ میلیونو ډالرو ته اړتیا لري.
اخوا بیا د کډوالو په چارو کې د ملګرو ملتونو د عالي کمېشنرۍ په خبره، ګڼو کورنیو چې د وروستیو زلزلو له کبله یې کورونه ویجاړ شوي، اوس په پرانېستې چاپېریال کې له سرپناه پرته شپې سبا کوي او له منفي ۲۵ درجې یخنۍ سره مخ دي.
