۸صبح، کابل: په بغلان کې پر یو دیني عالم د ناپېژاندو وسلهوالو له برید وروسته، تازه داعش وسلهوالې ډلې د دغه برید مسوولیت منلی دی.
داعش ته منسوب ټېلیګرام چینل چهارشنبه د مرغومې پر ۱۹مه، په یو خپاره کړي بیان کې ادعا کړې چې په بغلان کې د تېرې شپې برید د دغې ډلې کار و.
په خبرپاڼه کې راغلي چې داعش جنګیالیو دا برید د «خواجهخان» په سیمه کې کړی دی.
له دې مخکې ۸صبح ورځپاڼې ته سرچینو ویلي و چې د مرکزي بغلان په ولسوالۍ کې د یو جومات خطیب او د دیني مدرسې ښوونکی عبدالرزاق د ناپېژاندو وسلهوالو د برید په پایله کې وژل شوی دی.
سرچینو زیاته کړې وه چې په دې پېښه کې یو بل کس چې مولوي حمدالله محمدي نومېږي او د مرکزي بغلان ولسوالۍ د نوي ښار جومات خطیب دی، ټپي او روغتون ته وړل شوی دی.
سرچینو ویلي و چې مولوي حمدالله محمدي د طالبانو کلک پلوی دی او په خپلو خطبو کې یې د دغې ډلې له کړنو دفاع کوله.
طالبانو تر اوسه په دې هکله څه ویلي نه دي.
د یادونې ده چې داعش په وروستیو میاشتو کې څو څو ځلې په کابل، بغلان او غور ولایتونو کې هدفي او وژونکي بریدونه ترسره کړي دي.
دغې ډلې څه موده مخکې طالبانو د کډوالو چارو پخوانی وزیر او د حقاني شبکې مهم غړی خلیلالرحمن حقاني په کابل کې د یو ځانمرګي برید په ترڅ کې وژلی و.
