افغانستان د اسلامي هـمکاریـو سـازمـان د بشـري حـقـونــو کمېسیون غـړی شـو

د بهرنیو چارو وزارت اعلان وکړ چې د نایجیر هېواد په نیامي ښار کې، د اسلامي همکاریو سازمان د بهرنیو چارو وزیرانو شورا د ۴۷مې ناستې په څنډه کې، د ټاکنو په پایله کې، افغانستان ددغه سازمان، د بشري حقونو د خپلواک کمېسیون غړیتوب ترلاسه کړ.
اصیلا وردګ، د افغانستان په استازیتوب په نوموړي کمېسیون کې د کمېشنرې په توګه غوره شوې ده.
د بهرنیو چارو وزارت د اسلامي همکاریو سازمان د بشري حقونو کمېسیون د کمېشنرې په توګه د اصیلا وردګ ټاکل کېدل، د بشري حقونو د ارزښتونو په پياوړتیا کې یوه لاس ته راوړنه بللې ده.
د بهرنیو چارو وزارت د مالوماتو له مخې، د آسیایي ګروپ د نوماندانو له ډلې، افغانستان، ترکیې او ایران په ترتیب سره د تر ټولو زیاتو رایو په ګټلو، له ۲۰۲۱ تر ۲۰۲۴ کال پورې، د اسلامي همکاریو سازمان د بشري حقونو د خپلواک کمېسیون غړیتوب ترلاسه کړ.