اسراييلي چارواکو ویلي د فلایدوبۍ د الوتنې پېښه چې د دې لامل شوه الوتکه د تل ابیب پر ځای په سعودي عربستان کې ناسته وکړي، ښايي «ترهګریز برید» وي.
رویټرز چهارشنبه د سپټمبر پر ۳۰مه راپور ورکړی چې دا پېښه د دوو پیلوټانو ترمنځ د شخړې له کبله رامنځته شوې ده.
د نښتې پرمهال مرستیال پیلوټ، د الوتکې پر پیلوټ برید کړی او د الوتنې د پرځېدو هڅه یې کوله، خو په الوتکه کې سپرو کسانو یې مخنیوی کړی دی.
الوتکې له پېښې وروسته خپل لوری بدل کړی او په سعودي عربستان کې ښکته شوې او بریدګر هم نیول شوی دی.
اسرایيلي چارواکو ویلي چې لومړنیو ارزونو له مخې ښايي دا پېښه تر ډېره عمدي او «ترهګریز» برید وي.
ټول مسافر چې ویل کېږي ډېر یې اسراییلیان دي، له الوتکې روغ وتلي دي.
د اسراییل لومړي وزیر بنیامین نتنیاهو دا «خورا جدي امنیتي پېښه» بللې ده.
نوموړي ویلي چې سعودي چارواکي دې د فلایدوبی شرکت مرستیال پیلوټ چې له متحده عرب اماراتو اسراییل ته پر لار و، تر پوښتنو ګروېږونو لاندې راولي.
