۸صبح، کابل: د ملګرو ملتونو د ماشومانو د ملاتړ صندوق (یونیسف) وايي چې د ۲۰۲۶ کال تر پایه په افغانستان کې د ۱۵۰۰ تنکیو ځوانانو او پیغلو د مسلکي مهارتونو له ښوونې او د نویو فرصتونو له رامنځته کولو ملاتړ کوي.
نوموړي بنسټ سهشنبه د تلې پر ۲۸مه په اېکس پاڼه کې لیکلي چې د یونیسف په ملاتړ او د اسیايي بانک په تمویل د یوه پروګرام له لارې په مزارشریف ښار کې نجونې د ګلدوزۍ مهارت زده کوي.
دا پروګرام د تنکیو ځوانانو او پیغلو د وړتیا لوړولو او د ژوند د ښهوالي لپاره د فرصتونو د برابرولو په موخه پیل شوی دی.
یونیسف وايي، دا ملاتړ له تنکیو ځوانانو سره مرسته کوي چې د عملي مهارتونو په زده کولو خوندي او مقاومه راتلونکې جوړه کړي.
دا په داسې حال کې ده چې په افغانستان کې ښځې او نجونې د زدهکړو او کار په ګډون له ګڼو محدودیتونو سره مخ دي.
