۸صبح، کابل: د هند د بهرنیو چارو وزارت ویاند راندهیر جایسوال ویلي چې د طالبانو او هند ترمنځ د ګډې کمېټې څلورمه ناسته په نوې ډيلي کې ترسره شوې ده.
جایسوال پنجشنبه د چنګاښ پر ۱۸مه په خپرې کړې خبرپاڼې کې ویلي چې دا غونډه د هند د بهرنیو چارو وزارت د پاکستان، افغانستان او ایران څانګې د ګډ سکرتر اېم. انند پراکاش او د طالبانو د بهرنیو چارو وزارت د لومړي سیاسي ریاست د عمومي رییس شعیب بریالي په ګډه مشرۍ جوړه شوې وه.
د هند د بهرنیو چارو وزارت زیاته کړې چې په دې ناسته کې د دواړو غاړو ترمنځ اړیکو پر ټولو اړخونو خبرې شوې دي.
دا غونډه داسې مهال جوړه شوې چې هند او طالبانو په وروستیو کالو کې د بېلابېلو موضوعاتو په اړه خپلې ډیپلوماتیکې اړیکې پراخې کړې دي.






