په کابل کې د جاپان سفارت اعلان کړی چې ددغه هېواد دولت له افغانستان سره د ساري ناروغیو په وړاندې د مبارزې د پروژو د پياوړتیا لپاره د کابو ۱،۸ میلیون ډالرو مرسته کوي.
په افغانستان کې د جاپان سفارت شارژدافیر تاکاهشي او په افغانستان کې د روغتیا د نړیوال سازمان مسوول، د کب په ۲۵مه په دې اړه یوه هوکړه لاسلیک کړه. ددغې هوکړې د لاسلیک په مراسمو کې د عامې روغتیا وزارت مرستیال بشیر نورمل هم حاضر و.
په کابل کې د جاپان سفارت د اعلان له مخې، دا پروژه به د روغتیا د نړیوال سازمان او جاپان د نړیوالې همکارۍ موسسې جایکا له خوا د عامې روغتیا وزارت په همکارۍ اجرا شي.
د جاپان سفارت وايي چې ددغه هېواد په تازه مرستې سره به د روغتیا نړیوال سازمان او نور همکاران یې ددې وړتیا پيدا کړي چې د تشخصیي، څارونکو او کلنیکي خدماتو د زیاتوالي له لارې د ساري ناروغیو مخنیوی وکړي.
د جاپان سفارت په اعلامیه کې راغلي چې دا پروژه نه یوازې د اوسنیو ساري ناروغیو په وړاندې د مبارزې د اړتیاوو په برخه کې مرسته کوي، بلکې روغتیايي سیستم به په راتلونکي کې هم له بيړنیو موردونو سره د مقابلې لپاره پياوړی کړي.
هلمند، بادغیس، دایکندي او همداراز په کابل کې افغان ـ جاپان روغتون له مرستو څخه برخمن کېږي.
په کابل کې د جاپان سفارت د معلوماتو له مخې، دا هېواد له ۲۰۰۱ کال راهیسې ۹،۶ میلیارد ډالر له افغانستان سره مرسته کړې ده.