۸صبح، کابل: د طالبانو له خوا د د لوړو زدهکړو په خصوصي بنسټونو کې د نجونو محصلینو د شمولیت له ممنوعیت وروسته د افغانستان لپاره د جاپان سفارت ویلي، چې له دې پرېکړې ناهیلي شوي دي.
د افغانستان لپاره د جاپان د سفارت ټویټرپاڼې سه شنبه سهار د سلواغې پر یوولسمه په یوه ټویټ کې د نجونو او ښځو لپاره د ښوونیزو فرصتونو د برابرولو غوښتنه کړې ده.
د افغانستان لپاره د جاپان سفارت لیکلي: «موږ د کانکور یا د پوهنتونونو د لار مومندنې په ازموینه کې د نجونو پر ګډون د بندیز په اړه د طالبانو له پرېکړې ناهیلي یو.»
جاپان له طالبانو غوښتي، چې د لوړو زدهکړو په خصوصي بنسټونو کې د نجونو محصلینو د جذب د ممنوعیت په اړه پر خپلې پرېکړې له سره غور وکړي.
له دې مخکې هم یو شمېر بهرنیو دیپلوماتانو خصوصي پوهنتونونو او د لوړو زدهکړو په موسسو کې د نجونو پر حضور د طالبانو د لګول شوي بندیز د لیرې کېدو غوښتنه کړې ده.