جوبایډن: امریکا د افغان جګړې د پای ته رسولو له ديپلوماتیک بهیره ملاتړ کوي

د امریکا ولسمشر جوبایډن وایي چې د هغه په مشرۍ دولت د افغانستان د جګړې د پای ته رسولو لپاره له روان ديپلوماتیک بهیره کلک ملاتړ کوي.
د امریکا ولسمشر چې د کب په لومړۍ نېټه یې د مونیخ په امنیتي ناسته کې په آنلاین توګه خبرې کولې ووېل، امریکا همداراز دې موضوع ته ژمنه ده چې ډاډ ترلاسه شي، افغانستان یو ځل بیا د امریکا پرخلاف د ترهګرو فعالیتونو لپاره په امن پټنځای بدل نه شي.
جو بایډن زیاته کړې چې امریکا ژمنه ده چې په ناټو کې له خپلو متحدینو سره په افغانستان کې د پرمختګ په اړه سلا مشوره وکړي.
بایډن د امریکا د ولسمشر په توګه د خپل کار له پیلولو وروسته د لومړي ځل لپاره د افغانستان د سولې بهیر په هکله خبرې کړې دي.
دا بهیر د دونالد ترمپ په مشرۍ دولت پرمهال پیل شو او د اوږدو مذاکراتو په پایله کې امریکا او طالبانو د تېر کال د کب په لسمه نېټه موافقه لاسلیک کړه.
د بایډن دولت په داسې حال کې ددغې هوکړې ارزونه کوي چې طالبانو د تاوتریخوالي د کمښت، له القاعدې او نورو ترهګرو ډلو سره د اړیکو د پرې کولو او له افغان دولت او نورو لوریو سره معنا لرونکې خبرې اترې منلې دي.
د موافقې له مخې بهرني ځواکونه باید د روان میلادي کال په مې میاشت کې له افغانستانه ووځي. د ناټو دفاع وزیرانو په خپله دوه ورځنۍ غونډه کې په دې اړه پرېکړه ونه کړه.
د امریکا دفاع وزیر لوید آستین وېلي چې هېواد به یې په بیړه او په بې نظمۍ سره افغانستان پرې نه ږدي.