۸صبح، کابل: د ایران د بهرنیو چارو وزارت ویاند سعید خطیبزاده د افغانستان د مالي شتمنۍ په اړه د امریکا د ولسمشر جو بایډن پرېکړه شرموونکې، بشر ضد اقدام او ښکاره غلا بللې ده.
نوموړي نن دوشنبه د سلواغې پر ۲۵ تهران کې یو خبري کنفرانس ته وویل، چې امریکا د افغان ولس پیسې غلا کړې او هېواد يې د امریکا دا غلا په کلکو ټکو غندي.
خطیبزاده زیاته کړې: «دا لومړی ځل نه دی، چې امریکا د نورو هېوادونو پیسې غلا کوي؛ بلکې امریکا باوري ده، چې د نړۍ د ټولو هېوادونو د شتمنۍ مالک دی او کله چې وغواړي، د قاضي او منصفه پلاوي په توګه پرېکړه کولای او د نورو شتمني لوټلی شي.»
د خطیبزاده په باور، امریکا پر افغانستان تېری وکړ، چې له کبله یې افغانانو ته ګڼ مالي او ځاني زیانونه واوښتل؛ خو بیا هم د افغانانو پر پاتې شتمنۍ زړه نه سوځوي.
له بلې خوا د افغانستان د شتمنۍ په هکله د بایډن وروستۍ پرېکړه په کور دننه او بهر له زیات غبرګون سره مخ شوې ده. تازه د چین د بهرنیو چارو وزارت ویلي، چې امریکا د نړۍ تر ټولو شتمن هېواد دی؛ خو د افغانستان په څېر د یوه بېوزله هېواد شتمني غلا کوي.
د یادونې وړ ده، چې وړمه ورځ د امریکا ولسمشر جو بایډن په امریکا کې د افغانستان د کنګل شوې شتمنۍ نیمايي برخه د سپټمبر ۱۱ پېښې د قربانیانو کورنیو ته د غرامت په توګه ځانګړې کړه.
