د امریکا پخواني ولسمشر ډونالډ ټرمپ ویلي، چې ښايي چین پر تایوان برید وکړي.
د امریکا پخواني ولسمشر چهارشنبه د مارچ پر دویمه له فاکس بزنس سره په مرکه کې ویلي، باوري دی چې چين پر تایوان یرغل کوي.
ترمپ دغې مرکه کې ویلي، ښايي دا بريد ډېر ژر وشي.
ډونالډ ټرمپ د هغې پوښتې په ځواب کې چې ولې چین پر تایوان برید کوي وویل: «لامل یې دا ده، چې هغوی [چین] ګوري چې امریکا څومره ناوړه اداره کېږي.»
نوموړي ټينګار کړی، چې هغوی موږ ویني، ځکه مشران بې کفایته دي، له همدې کبله به دا کار وکړي.
چین تل د تایوان حکومت ناقانونه بللی او غواړي، دا هېواد له چین سره یوځای کړي. بیجینګ ان د اړتیا په صورت کې د ځواک کارولو ته چمتوالی ښوولی او له تایوان سره د متحده ایالاتو اړیکې له خپل حاکمیت څخه سرغړونه ګڼي.
