د امریکا د متحده ایالتونو نوي ولسمشر، (جوبایدن) د سلواغې په لومړۍ نېټه، په داسې حال کې ددغه هېواد د ۴۶م ولسمشر په توګه لوړه وکړه، چې په افغانستان کې د امریکايي پوځیانو شمېر ترټولو ټيټې کچې (۲۵۰۰تنو) ته رسېدلی دی.
اخوا، د افغانستان د ولسمشر لومړي مرستیال امرالله صالح ویلي چې کابل د امریکايي ځواکونو د شمېر کمېدو ته اندېښنه نلري.
تر دې مخکې ولسمشر محمد اشرف غني هم د امریکايي ځواکونو د شمېر د کمښت په غبرګون کې، د کابل او واشنګټن ترمنځ پر همغږۍ ټینګار کړی دی.
ښاغلي غني له سي ان ان تلوېزیون سره په مرکه کې ویلي ؤ «له افغانستانه د امریکايي پوځیانو د وتلو طرحه باید د دواړو هېوادونو د ګټو پر اساس جوړه شي!»
یو شمېر افغانان د افغانستان په اړه د امریکا د نوي حکومت د پرېکړو په تمه دي.
په افغانستان کې ځینې سیاسي او مدني فعالان هیله لري چې ښاغلی بایدن به د افغانستان د جګړې د پایته رسېدو، په خوا کې د تېرو دوو لسیزو لاسته راوړنو خوندیتوب ته پاملرنه وکړي.
دغه شان د ښځو د حقونو ګڼشمېر فعالینې په افغانستان کې د ښځو د تېرو دوو لسیزو لاسته راوړنو پر خوندیتوب ټینګار لري.
خو طالبان بیا د امریکا له نوي ولسمشر جوبایدن څخه غواړي ددغې ډلې او امریکا ترمنځ د دوحې موافقې ته- چې ولسمشر غني له ابهامه ډکه تعریف کړې- ژمن پاتې شي! د امریکا او طالبانو ترمنځ د ۲۰۲۰ زېږدیز کال د فبرورۍ په ۲۹مه، په قطر کې د سولې هوکړه لاسلیک شوه.
جوبایدن د خپلو ټاکنیزو کمپاینونو پر مهال، په افغانستان کې د امریکا د پوځي ماموریت په اړه ډېر څه نه دي ویلي.
ښايي د امریکا نوی ولسمشر جوبایدن په راتلونکو ورځو کې د افغانستان په اړه د خپلې ادارې خپل نوې تګلاره هم اعلان کړي.
د ویلو ده چې د امریکا له نوې ادارې دا غوښتنې په داسې حال کې مطرح کېږي چې په افغانستان کې ورځ تر بلې د جګړې لمن پراخېږي.
که څه هم چې د افغان دولت او طالبانو مرکچي پلاوي، د سولې مذاکراتو پېلولو په نامه دوحې ته رسېدلي، خو د څو ورځو له تېرېدو سره سره، تردې دمه د مذاکراتو پر اجندا جوړه نه ده شوې!