اردني سرچينو ويلي چې د دغه هېواد پر لور اته توغول شوي ايراني توغندي يې شنډ او نسکور کړي دي.
الجزيرې پنجشنبه د جولای پر ۱۶مه، راپور ورکړی چې دا څرګندونې يوې اردنۍ پوځي سرچينې کړې دي.
د راپور له مخې، دغې پوځي سرچينې ويلي چې د اردن په هوايي حريم کې د ايراني توغنديو شنډولو هېڅ ځاني او مالي زيان نه دی اړولی.
دا په داسې حال کې ده چې تر دې وړاندې د ايران پوځ اعلان کړی و چې د اردن په ازرق هوايي اډې کې يې د امريکا د پوځ د مخابراتي سيستمونو، د رادار د يوه ثابت مرکز او د سونتوکو د زېرمو پر لور بريدګرې بېپيلوټه الوتکې توغولې دي.
بلخوا، په وروستيو ورځو کې د هرمز تنګي د کنټرول پر سر د ايران او امريکا ترمنځ پوځي نښتې زياتې شوې دي.
