۸صبح، کابل: خبریالې او د رخشانه رسنۍ بنسټګرې زهرا جویا په بریتانیا کې د جګړو او شخړو له امله د رامنځته کېدونکي جنسي تاوتریخوالي په تړاو یوې پارلماني غونډې ته ویلي چې د طالبانو تر واک لاندې افغانستان کې ښځې او نجونې په قصدي ډول له ځورونې سره مخ دي.دا غونډه چهارشنبه د چنګاښ پر ۲۴مه، د وکیلانو د نړېوالې ټولنې د بشري حقونو د انسټیټیوټ او د نسلوژنې پر وړاندې د غبرګون ایتلاف له خوا په بریتانیا کې جوړه شوې وه.
په دې غونډه کې زهرا جویا ویلي چې د طالبانو تر واک لاندې هزاره ښځې له ځورونې سره مخ دي.
د غونډې نورو ویناوالو خبرداری ورکړی چې له جګړو سره تړلی جنسي تاوتریخوالی (CRSV) لا هم د وسلهوالو شخړو پر مهال له تر ټولو سختو جرمونو دی، خو د نړیوال جزايي قانون له پام وړ پرمختګونو سره سره، د مجازاتو معافیت لا هم یوه عادي چاره ده.
دوی ویلي، له جګړو سره تړلي تاوتریخوالي کې جنسي تېری، جنسي مرییتوب، جبري امیندواري، جبري ودونه، جبري شنډول او د جنسي تاوتریخوالي نور ډولونه شامل دي چې د جګړو او جنګي جرمونو په تړاو ترسره کېږي.
په دې غونډه کې ویل شوي چې د ملګرو ملتونو د راپور له مخې، په ۲۰۲۵ کال کې په ټوله نړۍ کې له جګړو سره د تړلي تاوتریخوالي نږدې ۱۰ زره تأیید شوې پېښې ثبت شوې دي.
