کابل د بـریـدونـو او چـاودنــو ښـار

په داسې حال کې چې د بین الافغاني مذاکراتو له پېلېدو پنځه میاشتې تېرېږي. په دې موده کې کابل ښاریان سختې شپې ورځې تېروي. د امنیتي بنسټونو د شمېرو له مخې په کابل کې سل چاودنې او بریدونه شوي چې له امله یې کابو ۵۰۰ تنه مړه او ټپيان شوي دي. د دغو چاودنو په پایله کې کابو ۵۵ موټر ویجاړ شوي دي. په دې موده کې پر ۲۶ پوځي او کابو ۳۰ ملکي موټرو د چسپکي مینونو چاودنې شوې دي. په تېرو پنځو میاشتو کې آن په ټکسي او بایسکلونو کې هم چسپکي مینونه اېښودل شوي دي. له بلې خوا، امنیتي مسوولین وايي چې په دې موده کې یې د کابو سلو چاودنو او بریدونه مخنیوی کړی دی. که څه هم طالبان پر ملکي وګړو بریدونه او چاودنې نه مني، خو حکومتي چارواکي وايي چې په پلازمیني کې ترورونه او هدفي وژنې د طالبانو له خوا کېږي.
که څه هم د روان کال د وږي په ۲۲مه په دوحه کې بین الافغاني مذاکرات پيل شول، خو په دې موده کې هېوادوالو په تېره بیا کابل ښاریانو سختې شپې ورځې تېرې کړې او نږدې هره ورځ د ښار په بېلابېلو برخو کې هدفي وژنې، چاودنې او بریدونه کېږي. د کابل د پولیسو د شمېرو له مخې، په تېرو پنځو میاشتو کې په کابل کې ۸۳ د مین چاودنې او همداراز یوولس وسله وال او راکټي بریدونه شوي دي. پر پوځي او ملکي خلکو ۵۵ د چسپکي مینونو چاودنې شوې چې ښايي شمېر یې له دې هم زیات هم زیات وي.
ددغو چاودنو او بریدونو په پایله کې ۴۳ پوځیان او ۱۰۴ تنه ملکي وګړي وژل شوي او همداراز په دغو پېښو کې ۳۳ پوځیان او ۲۹۸ ملکي وګړي ټپيان شوي دي. یوازې پر کوثر ښوونیز مرکز په برید کې ۳۰ تنه مړه او کابو اویا ټپیان شول، پر کابل پوهنتون په برید کې هم ۲۲ تنه مړه او کابو ۴۰ تنه ټپيان شول. د ولسي جرګې د غړي خان محمد وردګ پر موټرو په برید کې هم لس تنه مړه او ۵۲ نور ژوبل شول. پر کابل په یو ځل راکټي برید کې لس تنه مړه او ۵۱ ټپیان شول.
که څه هم امنیتي مسوولین وایي چې په تېرو پنځو میاشتو کې یې د سلو بریدونو او چاودنو مخنیوی کړی او یو شمېر مینونه یې شنډ کړي او همداراز یې د مهماتو څو زیرمې هم ترلاسه کړې دي.
په دې لړ کې امنیتي مسوولینو په ځلونو ویلي چې طالبان، القاعده، داعش او د حقاني ډله د کابل په بریدونو او چاودنو کې لاس لري. د ولسمشر لومړي مرستیال هم ویلي چې طالبان د کابل په بریدونو او چاودنو کې لاس لري او غواړي له دې لارې امتیاز ترلاسه کړي. خو طالبانو که څه هم پر پوځیانو د بریدونو مسوولیت منلی خو وایي چې پر ملکي وګړو، د رسنیو پر کارکوونکو او مدني فعالینو په برید کې لاس نه لري.
یوازې په تېرو پنځو ورځو کې په کابل کې اوه چاودنې او یو وسله وال برید شوی چې له امله یې اته تنه مړه او پنځه نور ټپیان شول. له دې مخکې رسنیو رپوټ ورکړی چې په پلازمیني کې د امنیتي وضعیت په اړه د اندېښنې له امله زیات شمېر مدني فعالین او د رسنیو کارکوونکي د هېواد پرېښودلو ته اړ شوي دي.
په کابل ښار کې په داسې حال کې ناامني زیاته شوې چې په دوحه کې د طالبانو مرکچي پلاوي خبرې درولې دي.