۸صبح، کابل: د افغانستان لپاره د بشري حقونو په چارو کې د ملګرو ملتونو ځانګړي راپور ورکوونکي ریچارډ بېنېټ په کاناډا کې له خبریالانو سره په ناسته کې د بیان ازادۍ پر محدودیتونو، پر ښځو او نجونو د فشارونو او د افغان خبریالانو پر ستونزمن وضعیت خبرې کړې دي.
بېنېټ پنجشنبه د لړم پر ۲۱مه کاناډا ته د خپل سفر په لړ کې د ټورنټو ښار په «مسي کالج» کې له یو شمېر خبریالانو او د رسنیو بنسټونو له مسوولانو سره لیدلي دي.
دغه ناسته د بیان ازادۍ مرکز په نوښت جوړه شوې او په کې د بشري حقونو حالت، پر رسنیو محدودیتونه او له ښځو او نجونو د هغوی د بنسټیزو حقونو تروړل ارزول شوي دي.
د ناستې ګډونوالو د نجونو پر زدهکړو دوامدار بندیز او پر ښځو د مخ پر زیاتېدونکې محدودیتونو په اړه اندېښنه څرګنده کړې او له نړیوالې ټولنې یې د طالبانو د حساب ورکولو لپاره د عملي اقداماتو غوښتنه کړې ده.
هغوی ویلي چې په تېرو پنځو کلونو کې د نړیوالې ټولنې غبرګون تر ډېره د اعلامیو پر خپرولو او د طالبانو د تګلارو تر غندلو پورې محدود پاتې شوی او د افغانستان د بشري حقونو په حالت کې یې د پام وړ بدلون نه دی راوستی.
د ناستې په بله برخه کې د رسنیو سانسور، اطلاعاتو ته د لاسرسي محدودیتونه، د خبریالانو نیول او ګواښل او پر خپلواکو رسنیو فشارونه هم ارزول شوي دي.
د بیان ازادۍ مرکز مسوول نجیب اصیل د افغان رسنیو او خبریالانو د وضعیت په اړه د یوه راپور په وړاندې کولو د خبریالانو د نیولو، ګواښلو او پر رسنیو د محدودیتونو د دوام په اړه اندېښنه څرګنده کړې ده.
هغه همداراز په پاکستان، ایران او ترکیه کې د افغان خبریالانو ستونزمن وضعیت یاد کړی او له ریچارډ بېنېټ څخه یې غوښتي چې د فرانسې له دولت او نورو اروپایي هېوادونو سره له خطر سره د مخ خبریالانو د ملاتړ او بیا مېشتېدنې په اړه خبرې وکړی.
