په ولسي جرګه کې د کندهار استازو سید احمد سېلاب، ګل احمد کمین او ورسره مقتدا مېران چې تېره ورځ (د چنګاښ په ۲۶مه) يې د کندهار ولایت مقام کې د خبري کنفرانس له لارې خبريالانو سره خبرې کولې، ويې ويل، موږ تل د خپل ولس ترڅنګ ولاړ یؤ او په هر وخت کې به یې دفاع کوو.
په ولسي جرګه کې د کندهار د خلکو استازي ګل احمد کمین وويل، چې کندهار کې د جګړې یو طرف عام خلک د سپر په توګه کاروي او له کورونو څخه یې د سنګر کار اخلي، خو بل لوری بیا په همدغه کورنو کې چې عام خلک هم په کې اوسي بمبار کوي چې په پايله کې د دواړو لوريو لخوا عامو وګړو ته زیان رسېږي.
نوموړي زياته کړه، مرکزي دولت کندهار ته پاملرنه زیاته کړې او په ډېر لنډ وخت کې به د کندهار وضعیت د تېر په څېر عادي شي او خلک به خپل عادي ژوند ته دوام ورکړي.
د کمین په خبره دا لومړی ځل نه دی چې کندهار کې جګړې زور اخیستی، بلکې کلونه وړاندې هم کندهار ورته حالت درلود.
بل لوري ته په ولسي جرګه کې د کندهار د خلکو بل استازي سید احمد سېلاب وویل، هغه نظامي او ملکي مامورین چې په دې حساس وخت کې له کندهاره تښتېدلي دي، د دې ترڅنګ چې له دندو لرې شي بايد مجازات هم شي.
نوموړي زياته کړه، کندهار ښې ورځې په مخ کې لري نو هغه وخت کې بايد دغه ډول مامورینو ته د دندې چانس ورنکړل شي.
سېلاب وويل، د کندهار اوسېدونکو ترڅنګ به ولاړ وي او د هغوی د دفاع په موخه به په ولایت او مرکز کې هلې ځلې کوي .
همداراز په ولسي جرګه کې د کندهاريانو بل استازي مقتدا مېران خپلو څرګندونو کې وويل، دا چې ولایتي ادارې د موټر سیکلونو د تګ راتګ او همدارنګه د شپې لخوا د خلکو پر تګ راتګ بندیز لګولی دی، دغه چاره د کندهار اوسېدونکو د ښېګڼې لپاره ده. نوموړي زیاته کړه، دې وروستيو کې غلچکي بریدونه زیات شوي او امنيتي ځواکونه ډېری په جګړې بوخت دي، نو دغې ستونزې خلکو ته سرخوږی جوړ کړی دی. د نوموړي په باور د ولايتي ادارې دغه ګام به د کندهار د امنيت په ښه والي کې اغېزناک ثابت شي.
په ولسي جرګه کې د کندهار د خلکو استازي داسې مهال د مطبوعاتي کنفرانس له لارې خلکو ته ډاډ ورکوي چې د کندهار ښار درې حوزې وسله والو طالبانو نیولي دي او د دوو حوزو په ځينو سیمو کې جګړه روانه ده.
د دې ترڅنګ د دغه ولایت له ۱۷ ولسوالیو يوازې دوه ولسوالۍ د امنیتي او دفاعي ځواکونو په ولکه کې دي.
