۸صبح، کابل: پخواني ولسمشر حامد کرزي يو ځل بيا په افغانستان کې د نجونو پر زدهکړو د لګول شوي بنديز د لغوه کېدو غوښتنه کړې ده.
کرزي چهارشنبه د چنګاښ پر ۲۴مه پر اېکس پاڼه ليکلي چې د نجونو او هلکانو لپاره د زدهکړو د زمينې برابرول د بېسوادۍ له امله د رامنځته کېدونکو ستونزو مخه نيولای شي.
هغه د ملګرو ملتونو د ماشومانو د ملاتړ صندوق (یونیسف) وروستي راپور ته په اشارېسره چې له مخې يې په افغانستان کې نږدې څلور ميليونه ماشومان د خوارځواکۍ له ګواښ سره مخ دي، ويلي چې د دې ګواښ د مخنيوي اساسي شرط د ټولو ماشومانو، نجونو او هلکانو، لپاره د عمومي زدهکړو د زمينې برابرول دي.
کرزي زياته کړې چې د مسلکي بشري ځواک روزنه او د عامه پوهاوي پراختيا د بېتعليمۍ او بېسوادۍ له امله د رامنځته کېدونکو ستونزو مخه نيولای شي.
خو طالبانو پر افغانستان له بيا واکمنېدو وروسته د ښځو او نجونو پر زدهکړو، لوړو زدهکړو، کار او سفر بندیز لګولي دي.
