۸صبح، کابل: د امریکا پخوانی ډیپلوماټ زلمی خلیلزاد وايي، په افغانستان کې د واشنګټن بنسټیزی ګټې دا دي چې دغه هېواد یو ځل بیا د هغو ترهګرو ډلو پر مرکز یا اډې بدل نه شي چې د امریکا پر وړاندې فعالیت کوي.
خلیلزاد شنبه د وږي پر ۲۱مه، په خپاره شوي ویډیويي کلپ کې ویلي چې امریکا نه غواړي افغانستان یو ځل بیا د «ګډوډۍ او بېنظمۍ» خوا ته ولاړ شي؛ ځکه د نوموړي په باور، دغه حالت کولای شي د ترهګرو ډلو د پراختیا او د امریکا پر وړاندې د ګواښونو د زیاتېدو لپاره زمینه برابره کړي.
هغه زیاته کړې چې د افغانستان اقتصادي پرمختګ او د نورو هېوادونو او شرکتونو په ګډون سره د دغه هېواد د طبیعي سرچینو پراختیا کولای شي د امریکا له ملي ګټو سره همغږې وي.
د خلیلزاد په وینا، که امریکا په افغانستان کې تعامل ونه کړي او د خپلو ګټو د خوندي کولو لپاره هڅې ونه کړي، داسې تشه به رامنځته شي چې د واشنګټن سیالان به یې ډکه کړي.
نوموړي په افغانستان کې د چین او روسیې حضور ته په اشاره سره ویلي چې چین هڅه کوي د افغانستان پر طبیعي سرچینو کنټرول ترلاسه کړي او روسیه هم په افغانستان کې «ډېره فعاله» ده.
خلیلزاد ټینګار کړی چې د افغانستان په اړه د امریکا سیاست باید د دغه هېواد اوسني او راتلونکي شرایط په پام کې ونیسي او څرګنده کړي چې واشنګټن غواړي افغانستان په راتلونکې کې په څه ډول هېواد بدل شي.
دا په داسې حال کې ده چې خلیلزاد اوس مهال د امریکا په حکومت کې هېڅ رسمي دنده نه لري. تر دې وړاندې د امریکا د بهرنیو چارو وزارت ویاندویانو هم ویلي چې د خلیلزاد څرګندونې د واشنګټن د رسمي دریځ استازیتوب نه کوي.
