خلیـلـزاد: نـړۍ تمـه لـري چـې افغانستان له واحدې طرحې سره د استانبـول ناستـې تـه ورشــي

د افغانستان د سولې په چارو کې د امریکا ځانګړی استازی زلمی خلیلزاد د وري په ۲۱مه نېټه افغانستان ته راغی او له ولسمشر محمد اشرف غني او د ملي روغې جوړې د عالي شورا له رییس عبدالله عبدالله سره یې کتنه او خبرې اترې وکړې. د استانبول ناسته چې ارګ یې ترسره کېدل په نږدې راتلونکي کې بولي، د خبرو چورلیز و.
د افغانستان د سولې لپاره د امریکا ځانګړي استازي له عبدالله عبدالله سره په کتنه کې ویلي چې نړۍ تمه لري د افغانستان اسلامي جمهوریت له واحدې طرحې سره د استانبول غونډې ته ولاړ شي. هغه همداراز ټینګار کړی چې هېواد یې د سولې په برخه کې د افغانستان له هڅو ملاتړ کوي او له سولې وروسته پړاو کې د افغانانو ترڅنګ ولاړ دی.
سپېدار وايي چې خلیلزاد د ملي روغې جوړې د عالي شورا په چوکاټ کې د داخلي اجماع د رامنځته کولو لپاره د پرمختګونو ستاینه کړې ده. هغه وویل: «امریکا او نړۍ د سولې بهیر د چټکتیا او په افغانستان کې د جګړې د پای ته رسولو او دایمي سولې د ټینګښت لپاره له شته فرصتونو د استفادې غوښتونکې ده.»
د افغانستان د سولې په چارو کې د امریکا ځانګړي استازي له ټولو لوریو غوښتي چې د جګړې د پای ته رسولو او دایمي سولې لپاره همکاري وکړي.
په دغه کتنه کې د ملي روغې جوړې د عالي شورا د مشرتابه غړو او یو شمېر سیاسي شخصیتونو هم ګډون درلود.
عبدالله په دې ناسته کې ویلي چې افغانستان عادلانه او دایمي سولې ته د رسېدو لپاره ژمن دی.
د ملي روغې جوړې د عالي شورا رییس زیاته کړې چې دا شورا د سولې د ټینګښت لپاره هڅه کوي او دا بنسټ د جمهوریت د نظریاتو په توحید کې مهم ګامونه پورته کړي او د افغانستان اسلامي جمهوریت په ګډې طرحې او نظر سره د استانبول غونډې ته ځي.
له بلې خوا، د ارګ د اعلان له مخې، ولسمشر محمد اشرف غني او خلیلزاد هم د سولې بهیر د پرمختګونو او د افغانستان د سولې په اړه د ترکیې د ناستې د چمتووالي په اړه خبرې اترې کړې دي.