د ایران مذهبي مشر ایتالله علي خامنهيي د دغه هېواد ولسمشریزو ټاکنو کې د مسعود پزشکیان له بریا وروسته ویلي چې نوموړی دې پراخې وړتیاوې په ځانګړې توګه ځوان بشري ځواک د خلکو هوساینې لپاره وکاروي.
د ایسنا خبري اژانس د راپور په حواله، خامنهيي شنبه د جولای پر ۶مه ویلي چې پزشکیان دې له دغو وړتیاوو د خلکو هوساینې او د هېواد پرمختګ لپاره ګټه واخلي.
نوموړي زیاته کړې: «د ایران منتخب ولسمشر ښاغلي پزشکیان ته هم سپارښتنه کوو چې د خدای تعالی په توکل مخته لاړ شي او د شهید رییسي لارې ته دوام ورکړي او د هېواد له پراخو وړتیاوو په ځانګړې توګه ځوان بشري، انقلابي او مومن ځواک څخه د خلکو هوساینې او هېواد پرمختګ لپاره کار واخلي.»
د یادونې ده چې مسعود پزشکیان د ایران د ولسمشرۍ څوارلسمې دورې ټاکنو په دویم پړاو کې د ډېرو رایو په ګټلو د دغه هېواد ولسمشر شو.
پزشکیان په دې پړاو ټاکنو کې ۱۶ میلیونه او ۳۸۴ زره او ۴۰۳ رایې ګټلې دي.
د نوموړي سیال سعید جلیلي بیا ۱۳ میلیونه او ۵۳۸ زره ۱۷۹ رایې اخیستې دي.
