د ایران ولسمشر مسعود پزشکیان ویلي چې تهران نه شي کولای خپل پخوانی دوښمن له پامه وغورځوي او باید له واشنګټن سره تعامل ولري.
ایراني رسنیو سهشنبه د نومبر پر ۱۲مه د پزشکیان له قوله ویلي چې تهران دې له خپلو دوښمنانو سره په زغم چلند وکړي.
نوموړي زیاته کړې: «که وغواړو که نه، باید د امریکا له متحدو ایالتونو سره په سیمهییزه او نړیواله کچه تعامل ولرو، ښه ده چې خپله دا اړیکې مدیریت کړو.»
مسعود پزشکیان دا څرګندونې د امریکا په ټاکنو کې د ډونالډ ټرمپ له بریالي کېدو یوه اوونۍ وروسته کړې دي.
دا په داسې حال کې ده چې ټرمپ د ولسمشرۍ په تېره دوره کې له شوې اټومي هوکړې بهر شو او پر ایران یې پراخ بندیزونه ولګول.
تر اوسه څرګنده نه ده چې ټرمپ به په خپله نوې دوره کې له ایران سره څه ډول چلند وکړي. نوموړي په خپلو ټاکنیزو منډو ترړلو کې ټينګار کړی چې نه غواړي له دغه هېواد سره په ټکر کې راشي؛ خو تهران هم اټومي وسلې نه شي لرلی.
