د خوست یو شمېر اوسېدونکو په دغه ولایت کې د جنايي پېښو او هدفي وژنو له زیاتېدو اندېښنه څرګنده کړې ده. هغوی طالبان د امنیت په ټينګولو کې پر ناغېړۍ تورنوي او ټينګار کوي چې ډېری دا ډول پېښې د طالبانو پوستو ته نږدې کېږي. د دغو اوسېدونکو په خبره، طالبان د جنايي پېښو او هدفي وژنو په کابو کولو کې پاتې راغلي دي. ورته مهال ځيني سرچینې ادعا کوي چې د زنځيرو او د پخوانیو امنیتي ځواکونو په وژلو کې طالبان لاس لري او په خبره یې، د ناپېژانده وسلهوالو په نوم پخواني پوځيان وژني.
په خوست کې د روانې میلادي میاشتې په اوږدو کې د ۸صبح ورځپاڼې موندنې ښيي چې په دغه ولایت کې د بېلابېلو پېښو له کبله د دوو پوځيانو په ګډون ۲۱ کسانو ته مرګ ژوبله اوښتې ده. د دې موندنو په حواله، د دغه ولایت له څو سیمو څخه ځیني موټر هم غلا شوي دي.
د خوست ښار اوسېدونکی منګل جان چې شاوخوا یوه اوونۍ وړاندې په دغه ولایت کې د یو پخواني نظامي پر موټر د ډزو شاهد و، وايي چې دا پېښه د طالبانو پوستې ته څېرمه شوې ده. د نوموړي په خبره، بریدګر له ډزو وروسته تښتېدلي دي.
د خوست دا اوسېدونکی زیاتوي: «چوک ته نږدې وم چې د ډزو غږونه مې واورېدل. دوو وسلهوالو پر یو موټر ډزې کولاې، څو دقیقې په سیمه کې و، سره له دې چې د طالبانو پوسته نږدې وه، هغوی یوازې ننداره کوله. له هغې وروسته چې وسلهوال خپل موټر کې کېناستل او حرکت یې وکړ، طالبان له خپلې پوستې وړاندې راغلل.»
منګل جان زیاتوي، وروسته یې ولیدل چې د ډزو له کبله یو پخوانی پوځي وژل شوی دی. نوموړی وايي: «په موټر کې څو کسان سپاره و، یو ماشوم هم و؛ خو له دې ډلې یوازې یو کس ووژل شو او هغه هم په پخواني حکومت کې پولیس و.»
د خوست د اسماعیلخېلو ولسوالۍ یو بل اوسېدونکي چې نه غواړي نوم یې یاد شي وايي چې څو ورځې وړاندې غلو د دغې ولسوالۍ یو اوسېدونکی په چړو سخت ټپي کړ او یوه ورځ وروسته یې د دغو ټپونو له کبله ساه ورکړه.
د اسماعیلخېلو ولسوالۍ دا اوسېدونکی زیاتوي: «دا ځوان په ډېره بېرحمۍ ووژل شو. د نیکو اخلاق ځوان و. د چړو څو ګوزارونه یې پرې کړي و او په روغتون کې یې ساه ورکړه.» نوموړی طالبان په ناغېړۍ تورنوي او وايي چې د دغې ولسوالۍ اوسېدونکي له ماښام وروسته که اړین کار ونه لري، له خپلو کورونو نه بهر کېږي.
ورته مهال، سرچینې ادعا کوي چې واک ته د طالبانو له رسېدو وروسته، دا ډله د ناپېژانده وسلهوالو په نوم په هدفي ډول د پخواني حکومت پوځيان او کارکوونکي وژني.
دا سرچینې چې نه غواړي په راپور کې یې نوم یاد شي ادعا کوي چې طالبان پخواني پوځيان وژني او وروسته یې پړه پر ناپېژانده وسلهوالو اچوي؛ په داسې حال کې چې په خبره یې، طالبانو په وار وار د سراسري امنیت ټينګښت خبره کړې او ویلي دي چې د خلکو ځان او مال خوندي دی.
دا په داسې حال کې ده چې طالبانو په خوست کې وروستۍ پېښه چې د یو ډاکټر د وژل کېدو او شپږو نورو د ټپي کېدو لامل شوه، کورنۍ دوښمني بللې ده.
په خوست کې د طالبانو امنیې قوماندانۍ رسنیز دفتر په یوې خپرې کړې خبرپاڼه کې ویلي چې د پېښې په تړاو یې دوه کسان نیولي دي.
د یادونې ده چې د خوست اوسېدونکي داسې مهال په دغه ولایت کې د جنايي پېښو له زیاتېدو اندېښنه ښيي چې تېرو څو ورځو کې په بلخ، هرات، فاریاب، غزني، کابل، لوګر او پکتیا کې د څو کسانو د وژل کېدو راپورونه خپاره شوي دي.